( وەکو باران )




	لاپه‌ڕه‌ی سه‌ره‌تا


	شیعری (وه کو باران) - بۆ نیشتیمان ‌ نیشتیمانێکم دیوەتەوە لە رۆشنایی فیکرمدا ... پڕپڕە لە باخچە گە ییوەکانى چێژ ، پڕە لە خۆشەویستى بارانو گوڵ ، پڕە لە ئاوەدانىو تەماشاى حەزین ، لێرە هەموو چیاکان سەریان نەویە و ... لە سەر پشتیان باخەکانى خەیاڵ رواونەتەوە ، لێرە خەونم وەکو کەشتیەکى چارۆکەدار ، بە سەر رێڕەوەى تەمەلولى ... گشت سەرابەکاندا ، بە هێواشى تێدەپەرێت ... خەونەکانم لێرە هەموو زیندوون ، لێرە نە دەسەڵات هەیەو نە کەس حاکمە ، شمشاڵى رۆح تونێلێکە ، فوى مناڵیمى پیا تێ دەپەڕێت ، لێرە ژیان بۆ من دەژى ، هەموو کۆشکو تەلارەکان لە ژێر پێمدان ، لە تەک هاورێکانمدا ... بە دەستە بچوکە خەڵەتێنراوەکانى منداڵیمان ... توڕیان دەدەینە کەنار دیوارێکى ئەودیو حەقیقەت ، **** لێرە لە هەموو شتێک بە ئاگام ، لە دەنگى ئاو ، لە شنەى درەختەبەرزەکانى هەست ، لە پانتایی بەرکەوتنى دانایی ... لە دڵۆپى باران ، کە چۆن خۆى ئەداتە بەر رێژنەى چێژ ، لە پێناو پاککردنەوەى گەڵایەک ، یان زیندو کردنەوەى گولێک ... تەماشاکەن بینین چەن حەقیقەتە ، کە باران خۆى ئەدات لە گەڵایەک ، رەنگە لاى تۆ وابێت ئیتر کۆتا . بەڵام لاى من ... پاکى گەڵا بەرگى بارانە ، ئەوە هەر بارانە لە فۆرمى گوڵدا خۆى ئەنوێنێت ، ئەوە هەر بارانە خۆى دەکات بە درەخت ، بە دەریا ، بە دارى تابوت ، ئەوە هەر بارانە خۆى دەکات ، بە مەل ، بە هەورو ، بە زریان ، باران ژیانە ... باران رۆحى زەویە ... گشت گیاندارانە ، **** من بە ئاگام لە هەموو شتێ ، لە خەمۆکى چیا راستگۆکان ، لە خۆشەویستى دایکم ، لە دڵتەنگى باوکم ، لە باوەشى گیتارەکەم ، لێرە بە ئاگام .... لە بێ خەمى خۆشەویستى ، لێرە ژیان ناوى خۆشەویستیە ، لێرە مرۆڤەکان گشت هونەرمەندن ... هونەرى هەست کردن ، هونەرى بیستن ، هونەرى بینین ، هونەرى چێژ کردن ، بیرکردنەوە .... ئاهه... بیرکردنەوە ؟ بیرکردنەوە لەوەى هاژە چۆن دروست دەبێت ، بیرکردنەوە لەوەى ، لە تێپەڕینێک بە ناو کوچەى هەست ، چۆن بەر سێبەرو هەتاو دەکەویت ؟ بیرکردنەوە لەوەى لە بینیندا راستى چیە ؟ لە راستیدا بینین چیە ؟ بیر کردنەوە لەوەى چۆن چێژ دەبەخشیت ؟ ، چۆن وەردەگریت ؟ چۆن پەپولە دێتە ژیان ؟ چۆن منالێک دروست دەبێت ؟ چۆن فەقیرێکى روت پۆشتە دەبینیت ؟ هێلانە چیە ؟ زام چیە ؟ ئاڵا چیە ؟ ئاشتبونەوە ، پەڕینەوە ، هەناسەدان ، بەرکەوتن ، چۆن چاوت لە چاوى کچێکى هەناریدا نوقم دەکەیت ؟ کە قەت نەتدیوەو قەتیش ئەو ساتە لە یاد ناکەیت چۆن ئەتوانیت چاوى زەینت کوێر بکەیت ؟ چۆن ؟ چۆن ؟ چۆن ؟ ... هەست کردن بە ئازارى برسیەک ، وەک برسێتى خۆت ... گەیشتنە لوتکەیە ، من کە تەماشاى لێوى کچێک بکەم ... دەزانم ئەگەر وێنەى لێوێکى ترى لە سەر بێت ، من سەیرى چاوى کچێک بکەم ئەزانم چەن عاشقە ، من دەزانم زانین چیە !!! *** نیشتیمانێکم دیوەتەوە لە رۆشنایی فیکرمدا ، دەمەوێت بگەمە ئەوجى ئەوجى ... لێرە گشت مرۆڤەکان عاشقن ، لەم دەریچەیەوە ، لە گوزەرى بیرکردنەوەمدا ، عاشقم عاشقى ژیانم ، عاشقى گشت مرۆڤەکان ، لێرە مۆسیقا سورایی خوێنمەو ، دەمارەکانم گۆرانى ، لە نێوان ترپەى یەکەمى دڵم بۆ ترپەى دوهەم ، شتێک هەیە ناوى بەردەوامیە ، ناوى رۆحە ... هەر دەمێک کە رۆح بێزار دەبێت ، هەست بە هێزى ترپەکانى دڵ دەکەم ، وا هەستەکەم دڵم قومە ئاوى کانیەکە ، لە ناو هەردوو لەپى دەستی ، کچێکى تینوى هەتاویدا ، کە دەیەوێت بیخواتەوە ، لە ناو بزەو بریسکەى دانى سپی و ، لە ناو ئاوێنەى دڵما ، تەماشاى چاوە گەورەکانى خۆى دەکاتو پێدەکەنێت ، منیش دڵم خوێنى سپى لێ ئەچۆڕێ ، خوێنێک لە باران ... خوێنێک پڕپڕە لە نۆتەى مۆسیقا ، پڕە لە بەرامەى یەکەم بارانى پاییز ، پڕە لە نوێژى گەڵا ... پڕ لە وەرین ، لە نوشتانەوەى هزرى سەوزم ... ***** من لە هەر شوێنێک بم هەر لێرەم ، بۆیە حەز دەکەم نیشتیمانى شوێن پێکانم بەجێ بێڵم ، بڕۆم هەتا دەچمە بەر دیوانى مەرگ ، منیش وەک باران لە هەموو فۆرمێکدا خۆم ئەنوێنم ، بۆیە مەرگ پیرۆزیە بۆنى بارانە ، کۆتایی نەمرییە هەرگیز نەمرییە ، هەرگیز نەمریی ... نوێنەر ئەحمەد
	Qadirzada.com © 2009. All rights reserved