نەوەی پایز.

زستان په‌رچه‌می پایز ته‌ڕ ده‌كا

له‌ نیگای خۆڵی شه‌وا ده‌یدوێنێ

مانگ وه‌ك چاوانی برۆی زه‌رد ده‌كا

له ‌بسكی هه‌ورا سه‌ری ده‌ردێنێ

* * *

خۆر كه ئاوا بێت وه‌ك زامی پایز

ده‌لاقه‌ی شوێن پێت له‌دووی نه‌خش ده‌كا

هه‌ور به‌ سورمه‌ی تاریكی شه‌وان

تارمایی باڵات وه‌ك شه‌و ره‌ش ده‌كا

* * *

چه‌نده‌ تامه‌زرۆی پایزێك ئاڵم

رووی زه‌ردی هه‌تاو بدره‌وشێته‌وه‌

جیلوه‌ی كانیه‌ك ناخت پاراوكا

دورگه‌ی ده‌روونم بگه‌شێته‌وه‌

* * *

بیرته‌ پایزێك له‌سه‌ر گه‌ڵایه‌ك

تریفه‌ی نیگای چاوانتم كێشا

بووه‌ ناسنامه‌ی ڕازێكی شه‌و رۆم

له ‌تیشكی گزنگ جوانتر دره‌وشا

* * *

خۆ من ده‌مزانی بارخانه‌ی پایز

له ‌كۆچ و باری رۆژئاوا ده‌چێ

به‌ڵام هه‌تاكه‌ی چوار وه‌رزی ساڵم

كۆرپه‌ی خاكه‌كه‌م به‌ خوێن هه‌ڵقرچێ

* * *

ساڵ پایزێكه ‌و چوارمێخه‌ی رۆژه‌

خۆری ئاوابوون ئاورنگی بایه‌

كۆرپه‌له‌ی هه‌ستم زمانی پژا

كه‌وته‌ دوای پایز به ‌دایه‌ دایه‌

* * *

نه‌وه‌ی پایزم... رووت رووتم وه‌ك ئه‌و

شیعر نابێته‌ كاڵا و سه‌رینم

له‌ كوێ لووتكه‌یه‌ك سنگیم بۆ وازكا

له‌ زامی جه‌رگیا ئاگر ده‌بینم.

ستار ئەحمەد