ژنێك له‌هه‌نسكی گوڵ ناسكتره‌

ژنێك له‌هه‌نسكی گوڵ و

دانه‌ی باران ناسكتره‌

رۆژانی زریوه‌ی به‌فره‌و

شه‌وانی نوقمی ئاگره‌

روومه‌تی كانیله‌ی خه‌مه‌

چاوه‌كانی

دوو به‌رسیله‌ی  چرۆی ترێ‌

پرچی لاسكی سنه‌وبه‌ره‌

له‌گه‌رووی خه‌زانا ده‌مرێ‌

سنگی لوتكه‌ی سیاپۆشه‌

دوو سووره‌ سێوی ئه‌و دیوی

له‌سه‌ر كۆشه‌

گه‌ردنی تووله‌ رێی نووره‌

ده‌روونی مه‌زرای به‌رامه‌و

نه‌رمه‌ هه‌ناسه‌ی چنووره‌

قه‌دی شمشاڵی شوانه‌

شه‌ماڵی جوانی ده‌یژه‌نێ‌

زمانی فه‌رهه‌نگی شیعره‌

ئاسۆ چوار چێوه‌ی ده‌ته‌نێ‌

كوڵمی مانگی شه‌وی تاره‌

گه‌واڵه‌ی ژان دایپۆشیوه‌

سه‌رسامم له‌كاری خودا

هه‌رگیز جوانی وام نه‌دیوه‌

ستار ئه‌حمه‌د