مێشك ئەگرێ بۆ پێناسەیەك ...

١

لەكەناری كیشوەرێك

بەتەورێكەوە

شكاندنی یاساكان ئارەقەیان پێ ئەكردم

    ٢

ئاگردانەكەم مۆدێل بازە و

چیتر بەكاغز و دار گڵپە ناگرێ

   ٣

حەربایەك لێم ئەڕوانێ و سەری لێم سووڕماوە

منیش تاوتاو هەر جارە و بەڕەنگێك ئەگۆڕێم

لەسپییەوە بۆ شەو لەزەردەوە بۆ بەهار

لەخــــــــــــــــــــــــــۆمەوە بۆ ئەو

    ٤

دڵێكم بەشانا داوە و لەبازاری وەفادا

كەس دڵێكی نوێ ناكڕێ

هەموو تالیبی دڵێكن قایلن بەخاش بوونی

وەلێ پرۆسەی بەسەردا نەهاتبێ

    ٥

شیعریك كە لێی یەقینم

دەرگا بەڕووی قەڵەمەكەمدا دادەخا و

بەزۆڵ خۆی هەژمار دەكا

     ٦

گۆرانییەك لەرزم لێدێنێ

بۆ دەمێك ئەمباتەوە

لەلانكەكەمەوە یارییەكان

زیندەگی دەسەلمێنن

    ٧

مەراقێك دامی گرتووە

چۆن بەڕوح لەبەرەكانا

خۆم هەڵواسم

     ٨

سیگارەكەم سەرشێتەو هەر جارەو لەدووكەڵیا

قۆرییەكم بۆ ئەخولقێنێ

وای منیش چەندە كاڵ فامم

بۆ شوببەیكێك هەزاران جار

دەستی سڕینم بۆی درێژ كردووە

      ٩

شەو نییە و خەو نەبینم

خەو نییە و دووجار لەدایك نەبمەوە

   ١٠

چەن بێ یاسایە ئەم ژین

كەڕوڵاڵەكان دادوەرن و

خۆپیشاندەرەكان گۆرانی بێژ

                      سەڵاح قابیل

                   5/7/2013 دێ