سوپای پاسداران و پێنتاگۆن کوژرانی قاسم سولەیمانی پشتڕاستدەکەنەوە

 

 

ئەمڕۆ هەینی سوپای پاسداران و پێنتاگۆن رایانگەیاند کە قاسم سولەیمانی کوژراوە.

رووداو - هەولێر

 

 

فەرماندەیەكی بێ ژیاننامە

 

قاسم سولەیمانی، فەرماندەی سوپای قودسی ئێران، چەندە بەناوبانگە، ئەوەندەش زانیاری لەسەر خۆی و ژیانی كەمە، لەبەر ئەوەی بڕوای بە دەركەوتن و دیمانەی میدیایی نییە. دەیڤید پاتریكاراكۆس، نووسەر لەبواری بەرنامە ئەتۆمییەكەی ئێران، ساڵانێكی زۆر هەوڵی چاوپێكەوتن لەگەڵ سولەیمانی دابوو، وەك خۆی بە ماڵپەڕی (دەیلی بیست)ی ئەمریكی گوتبوو: "ئەگەر خامنەیی و قاسم سولەیمانییان بۆ پێشنیاز كردبام بۆ چاوپێكەوتن، سولەیمانیم هەڵدەبژارد، بەڵام ئەو بە روونی و بەخێرایی وەڵامی داواكەمی دایەوە: ئەو شتە لە مێشكت دەركە".

 

فەرماندە ئێرانییەكە لە كۆبوونەوە فەرمییەكانیشدا كەمدووە. بەرپرسێكی پێشووی حكومەتی عێراق بە گۆڤاری (نیویۆركەر)ی ئەمریكی گوتووە :"10 كەس لە ژوورەكە دانیشتوون، بەڵام كاتێك سولەیمانی دێتە ژوورەوە، لەگەڵت دانانیشێ، بەڵكو لەوپەڕی ژوورەكە لە گۆشەیەك بەتەنیا و بەبێدەنگی دادەنیشێ. قسە ناكات، تێبینی نادات، تەنیا دادەنیشێ و گوێ دەگرێ، بەڵام بێگومان هەموو كەسانی ناو ژوورەكە بیریان لای ئەوە".

 

جیا لەمە، ژمارەیەكی زۆر لە بەرپرسانی رۆژهەڵاتی نێوەڕاستیش نایانەوێ زانیاری لەسەر ئاشكرا بكەن. بەرپرسێكی باشووری كوردستان كاتێك لە 2013  لەلایەن گۆڤارە ئەمریكییەكەوە پرسیاری قاسم سولەیمانی لێدەكرێ، یەكسەر دەڵێ: "نامەوێ بەشێك بم لەمە". بەرپرسێكی پێشووی مۆسادیش پاش وەستانێك بە تەوسەوە دەڵێ: "هاوڕێیەكی زۆر باشی منە".

 

سولەیمانی، تەمەن 61 ساڵ، لە گوندی قەناتی مالیك لە پارێزگای كرمان لە باشووری رۆژهەڵاتی ئێران لە دایك بووە كە تەنیا چەند كاژێرێك لە سنووری پاكستان و ئەفغانستانەوە دوورە. پێكهاتەی كۆمەڵایەتی عەشایەری لە پارێزگای كرمان بەهێزە. عەلی ئەلفونێ، لێكۆڵەر لە پەیمانگەی ئینتەرپرایزی ئەمریكی پێیوایە ئەم تایبەتمەندییە عەشایرییەی ناوچەكە ئەوی ئامادە كردووە بۆ ئەوەی "لە كۆمەڵگا عەشایەرییەكانی وەكو عێراق و ئەفغانستان چالاك بێ".

 

لە شەستەكانی سەدەی رابردوودا، چاكسازی زەوییە كشتوكاڵییەكانی لەلایەن رژێمی پاشایەتی ئێرانەوە دەستیپێكرد، ئەو چاكسازییانە ژیانی خێزانی سولەیمانییان سەراوبن كرد، بەهۆی ئەو پلانەوە باوكی فەرماندە ئێرانییەكە كەوتە ژێر قەرزێكی 900 تومەنییەوە كە بۆ ئەوكات پارەیەكی زۆر بوو، هەر ئەمەش سولەیمانیی تەمەن 13 ساڵی ناچار كرد دەست لە خوێندن هەڵگرێ و روو لە كرێكاریی باڵەخانەكان لە شاری كرمان بكات، لە گەرمەی شۆڕشی ئێراندا لە 1979 وەكو تەكنیككارێك لە شارەوانیی كرمان كاری دەكرد.

 

سولەیمانی لە تاران دەژی، باوكی سێ كوڕ و دوو كچە، كەسانی نزیك لە خۆی باس لەوە دەكەن كە باوكێكی بە سۆزە بۆ منداڵەكانی. بەرپرسانی ئەمنیی رۆژهەڵاتی نێوەڕاستیش دەڵێن: "رێز لە هاوژینەكەی دەگرێ" و زۆرجار بۆ گەشتەكانی دەرەوەی وڵات لەگەڵ خۆیدا دەیبات. بەگوێرەی راپۆرتێكی (نیویۆركەر)، بەدەست پرۆستاتێكی قورس و پشتئێشەوە دەناڵێنێ، بەم حاڵەشەوە هاوڕێیەكی عێراقیی نزیكی سولەیمانی بە سەرسوڕمانەوە بە گۆڤارە ئەمریكییەكە دەڵێ: "ئەو هەموو بەیانییەك كاژێر چوار لە خەو هەڵدەستێ و نۆ و نیوی شەو دەچێتەوە نێو جێگەی خەوتنەكەی".

 

شۆڕش، سوپا و كوردستان

 

پێش سەركەوتنی شۆڕش هیچ ئاماژەیەك نییە كە قاسم سولەیمانی حەزی لە سیاسەت بووبێ، بەڵام لەگەڵ سەركەوتنی شۆڕش یەكسەر ناوی خۆی لە سوپای پاسداری شۆڕشی ئیسلامیدا نووسی. عەلی سوفان، لێكۆڵەر لە ناوەندی لێكۆڵینەوەی سوفان، لە راپۆرتێكدا بۆ گۆڤاری دژەتیرۆری ئەمریكا دەنووسێ: "دەبێ سەرنجی كەسێكی راكێشابێ، چونكە هەر دوای تەواوكردنی مەشقە سەرەتاییەكان كرا بە راهێنەری سەربازەكانی دیكە".

 

یەكەم ئەزموونی شەڕی قاسم سولەیمانی لە رۆژهەڵاتی كوردستان بوو، كاتێك لە تەمەنی 22 ساڵی لەگەڵ یەكەیەكی سەربازی لە كرمانەوە رەوانەی مەهاباد كران. هەر لەوێ چاوی بە مەحموود ئەحمەدینەژاد، سەرۆككۆماری پێشووی ئێران كەوت كە لە تەمەنی 23 ساڵیدا راوێژكاری پارێزگاری سنە بوو. بەشداری لە هێرشەكانی سەر رۆژهەڵاتی كوردستان تاوەكو ئێستاش لە ریزەكانی سوپای پاسداراندا وەكو نیشانەیەكی شانازی سەیر دەكرێ. ئەلفۆنێ پێیوایە :"رەنگە ئەزموونی سولەیمانی لە كوردستان رۆڵی هەبووبێ لەوەی وەك فەرماندەی سوپای قودس دەستنیشان كرا".

 

شەڕی عێراق و دزینی گیسك

 

لە سەرەتای جەنگی عێراق و ئێران، قاسم سولەیمانی كە رۆژئاواییەكان بە "فەرماندەی سێبەر" ناوی دەبەن، رەوانەی كرمان كرایەوە بۆ ئەوەی سەربازی نوێ پێبگەیەنێ، بەڵام هێندەی نەبرد جارێكی دیكە خۆی لە بەرەكانی پێشەوەی جەنگ بینییەوە. لە ماوەی هەشت ساڵی جەنگەكە كە نزیك یەك ملیۆن كوژراوی لێكەوتەوە، سولەیمانی لە زۆربەی شەڕە گەورەكاندا بەشدار بووە، لەوانەش شەڕی كۆنترۆڵكردنەوەی شاری بۆستان لە پارێزگای خوزستان لە 1981، ئۆپەراسیۆنی نەسری 4 لە 1987 كە تێیدا هێزەكانی ئێران هاتنە ناو هەڵەبجە و سوپای عێراق چەكی كیمیایی بەكارهێنا، هەروەها لە شەڕی نیمچە دوورگەی فاو لە پارێزگای بەسرە كە شكستەكەی هۆكاری ئاگربەستی نێوان هەردوو وڵات بوو، بەگوێرەی زانیارییەكان سولەیمانی لە سەرەتاوە دژی هێرشی سەر فاو بووە.

 

لە ماوەی جەنگە هەشت ساڵەكەدا، سولەیمانی بەهۆی ئازایەتی و مامەڵەی باش لەگەڵ سەربازەكانی ناوی دەركردبوو، بە تایبەتیش بەهۆی ئەو جەولانەی كە لە نزیك هێڵەكانی سوپای عێراق دەیكرد و تێیدا نەك هەر خۆی بە سەلامەتی دەهاتەوە، بەڵكو لە زۆربەی حاڵەتەكاندا گیسكێكی لەگەڵ خۆیدا دەهێنا بۆ ئەوەی سەربازەكانی بیخۆن. بەگوێرەی راپۆرتەكەی دژەتیرۆری ئەمریكا، هەر بەهۆی ئەمە بوو كە سولەیمانی لەناو سەربازەكاندا بە "گیسكدز" ناوی دەركردبوو.

 

ئەلفۆنێ كە چەندین پرۆفایلی لەسەر سولەیمانی ئامادە كردووە، دەڵێت سولەیمانی لەگەڵ فەرماندەكانی سەرەوەی خۆی توند بووە، بە تایبەتیش لەگەڵ موحسین رەزایی، فەرماندەی پێشووی سوپای پاسداران، هەر بۆیەش دوای لێكەوتنی رەزایی لە پۆستەكەی لە 1997 ، بوو بە فەرماندەی باڵای سوپای قودس.

 

شەڕی تریاك و تاڵیبان

 

لە دوای تەواوبوونی جەنگ، سولەیمانی رەوانەی پارێزگای كرمان كرایەوە، بۆ ئەوەی "شەڕی دژی مادە هۆشبەرەكان" ئیدارە بكات، دوای سێ ساڵیش توانی ناوچەكە ئارام بكاتەوە. قۆناغی گرنگی ژیانی سەربازی و سیاسی لە ئاداری 1998ەوە دەستپێدەكات، كاتێك كرا بە فەرماندەی سوپای قودس كە لقی چالاكییە دەرەكییەكانی سوپای پاسدارانە و ئەركی هەناردەكردنی شۆڕشیان لەسەر شانە.

 

پێنج مانگ دوای دەستبەكاربوونی لەو پۆستە، هێزەكانی تاڵیبان هێرشیان كردە سەر مەزار شەریف لە باكووری ئەفغانستان كە تێیدا سەدان پیاو، ژن و منداڵی شیعە كوژران، لە ناو كوژراوەكاندا هەشت دیپلۆمات و رۆژنامەنووسێكی ئێرانیش هەبوون. ئەو كات یەحیا رەحیم سەفەوی، فەرماندەی سوپای پاسداران داوای لە خامنەیی كرد فەرمانی هێرش بۆ سەر شاری هەرات، لە رۆژئاوای ئەفغانستان دەربكات، تەنانەت ئێران 250 هەزار سەربازیشی لەسەر سنووری ئەفغانستان كۆكردەوە.

 

قاسم سولەیمانی دژی ئەو پلانە بووە پێشنیازی ئەوەی كردووە "هاوپەیمانێتیی باكوور" لە ئەفغانستان بەهێز بكرێ، هەر خۆیشی ئەركی ئیدارەكردنی هێرشەكانی ئەو هاوپەیمانێتییە لە سنوورەكانی باكوور بەرەو ناوچەكانی دیكەی گرتبووە ئەستۆ. شارەزایان پێیانوایە جەنگی عێراق تەكتیكە سەربازییەكانی فێری فەرماندە ئێرانییەكە كرد، بەڵام ئەوە شەڕی تاڵیبان لە نەوەدەكان بوو فێری كرد چۆن لەسەر شەڕی بە وەكالەت ستراتیژێكی گەورەتر بۆ فراوانكردنەوەی نفووزی ئێران لە ناوچەكە دامەزرێنێ.

 

هێرشەكانی ئەمریكا و هاوپەیمانان بۆ سەر ئەفغانستان دەرگای پەیوەندییەكی بێوێنەیان لەنێوان تاران و واشتندا كردەوە، ئەمریكا دەیویست تۆڵەی هێرشەكانی 11ی سێپتەمبەر بكاتەوە، ئێرانیش تاڵیبان و قاعیدەی بە مەترسییەكی گەورە لەسەر سنوورەكانی رۆژهەڵاتی خۆی دەبینی. ئەو كات رایان كرۆكەر دانوستانكار و جێگری باڵیۆزی ئەمریكا لە ئەفغانستان بوو. بەپێی راپۆرتێكی (نیویۆركەر) دانوستانكارێكی ئێرانی بە كرۆكەری گوتبوو :"حاج قاسم بە هاوكارییەكانمان دڵخۆشە"، كە زیاتر لە بواری دەستنیشانكردنی مۆڵگەكانی قاعیدە لە ئێران و ئەفغانستان بوون.

 

رووخانی بەعس و هەڵكشانی سولەیمانی

 

دانوستانكارە ئێرانییەكە لە قۆناغێكی هاوكارییەكاندا بە كرۆكەری گوتبوو سولەیمانی بیر لەوە دەكاتەوە پێداچوونەوەیەكی تەواو بە پەیوەندییەكانی ئێران و ئەمریكادا بكرێتەوە. بەڵام مانگی هەنگوینی كرۆكەر و سولەیمانی زۆری نەخایاند. جۆرج بوشی كوڕ، سەرۆكی پێشووتری ئەمریكا، لە گوتارێكی كانوونی دووەمی 2002 ئێرانی لەبەرەی وڵاتانی "نەگریس" دانا. كرۆكەر ساڵانێك دواتر بە گۆڤاری (نیویۆركەر)ی گوت :"یەك وشە مێژووی گۆڕی، ئێمە زۆر نزیك ببووینەوە".

 

جەنگی 2003ی عێراق خاڵی وەرچەرخانی سەرەكی بوو. بۆ یەكەمجار لە مێژووی دامەزرانی كۆماری ئیسلامیدا، هێزەكانی ئەمریكا لە سێ لاوە (واتە كەنداو لە باشوور، ئەفغانستان لە رۆژهەڵات و عێراق لە رۆژئاوا) لەگەڵ ئێراندا دەبوون بە هاوسنوور. ئەو جەنگە ئێران و سووریای لە هەموو كات نزیكتر كردەوە، لەبەر ئەوەی هەردوو وڵات پێیانوابوو ئەگەر پلانی ئەمریكا لە عێراق سەركەوتوو بێ، دواتر نۆرەی ئەوان دێ.

 

بەگوێرەی راپۆرتەكەی گۆڤاری دژە تیرۆری ئەمریكا، قاسم سولەیمانی بە دوو ئاراستە كاری دەكرد، لەلایەكەوە یارمەتی حكومەتی سووریای دا چەكداری سوننەی جیهادی رەوانەی عێراق بكات و مەترسی لەسەر هێزە ئەمریكییەكان دروستبكات، لە لایەكی دیكەشەوە بۆ هەمان مەبەست مەشقی بە میلیشیا شیعەكانی عێراق دەكرد. بە گوێرەی راپۆرتەكە لە نێوان ساڵانی 2006 بۆ 2011 (واتە كاتی كشانەوەی هێزەكانی ئەمریكا)، گروپێكی وەكو عەسایب ئەهلی هەق زیاتر لە 6000 هێرشی لەو جۆرەی كرد.

 

لە ساڵی 2006، قاسم سولەیمانی بۆ ئیدارەكردنی شەڕی یەك مانگەی حیزبوڵڵا و ئیسرائیل روو لە لوبنان دەكات، فەرماندە ئەمریكییەكان لەو ماوەیەدا هەست بە كەمبوونەوەی بەرچاوی هێرشی میلیشیا شیعەكان دەكەن. دوای گەڕانەوەی نامەیەكی بۆ فەرماندە ئەمریكییەكان نووسیبوو: "هیوادارم بەو كەشە ئارام و بێدەنگەی بەغدا دڵخۆش بووبن، من لە بەیروت سەرقاڵ بووم".

 

لەدوای پێكهێنانی حكومەتی عێراق لە 2005، سنووری چالاكییەكانی سولەیمانی بۆ گۆڕەپانی سیاسیی عێراقیش درێژبووەوە، بەتایبەتیش لە كاتێكدا پەیوەندیی لە مێژینەی لەگەڵ بەشێكی زۆر لە سەركردە شیعە عێراقییەكاندا هەبوو.  هاوكارێكی نزیكی جەلال تاڵەبانی، سەرۆككۆماری كۆچكردووی عێراق، لە ساڵی 2003 بە (نیویۆركەر)ی گوتووە "كاتێك بە نەخێر وەڵامی (سولەیمانی) دەدەینەوە، كێشەمان بۆ دروستدەكات، تەقینەوە و تەقە دەستپێدەكات".

 

لەو ساڵانەدا سولەیمانی بەرەبەرە بۆ حاكمی بێ ئەملا و ئەولای عێراق بوو. بە گوێرەی راپۆرتی گۆڤارە ئەمریكییەكە سولەیمانی لە ساڵی 2008 نامەیەكی تەلەفۆنی بۆ تاڵەبانی دەنووسێ كە تێیدا رووی قسەی لە ژەنەراڵ دەیڤید پێترایۆس، فەرماندەی باڵای ئەو كاتی ئەمریكا لە عێراق بوو. لە نامەكەدا هاتووە :"بەڕێز ژەنەراڵ پێترایۆس: دەبێ بزانیت كە من، قاسم سولەیمانی، چاودێری سیاسەتی ئێران بۆ عێراق، لوبنان، غەزە و ئەفغانستان دەكەم، باڵیۆزیش لە بەغدا ئەندامێكی سوپای قودسە. ئەو كەسەش كە دێتە شوێنی هەر ئەندامی سوپای قودسە". ئەو كات ئەمریكییەكان دەیانزانی "حاج قاسم" لە دوای خامنەیی كەسی دووەمە لە داڕشتنی ستراتیژی ئێران بۆ عێراق.

 

شەڕی داعش... تەماحی سەركەوتنێكی ستراتیژی

 

بەهاری عەرەبی و شەڕی نێوخۆی سووریا دەرفەت و هەڕەشەیەكی گەورەش بوو. رووخانی رژێمی سووریا نەك هەر لینكی نێوان ئێران و حیزبوڵڵای لوبنانی دەپچڕاند، بەڵكو رێكخراوە لوبنانییەكەی دەخستە ناو گەمارۆیەكی سەربازی سەختیشەوە. لە چوار ساڵی یەكەمی شەڕەكەدا رژێمی سووریا ناوچەیەكی زۆری لە دەستدا، لەو ماوەیەدا قاسم سولەیمانی و فەرماندەكانی سوپاكەی خەریكی پێكهێنان، راهێنان و ناردنی گروپە میلیشیا شیعەكانی رۆژهەڵاتی نێوەڕاست بۆ ئەفغانستان بوون.

 

ئەو كات سولەیمانی بە بەرپرسێكی عێراقی گوتبوو :"سوپای سووریا بێكەڵكە، یەك فیرقەی بەسیجی ئێرانم بدەنێ، دەتوانم دەست بەسەر هەموو وڵاتەكەدا بگرم". بەرپرسێكی ئەمریكیش بە گۆڤارە ئەمریكییەكەی راگەیاندبوو :"سولەیمانی خۆی ئیدارەی شەڕی سووریا دەكات". سولەیمانی لە 2012 هەوڵی لەگەڵ بەرپرسانی هەرێمی كوردستان دابوو تاوەكو رێگەی پێبدەن بە كوردستاندا وەكو رێڕەوی گواستنەوەی چەك و تەقەمەنی بۆ سووریا بەكاربهێنن. ئەمجارەیان بەرپرسانی هەرێمی كوردستان دەستیان بە ڕووی داواكەی سولەیمانییەوە نابوو.

 

سەرهەڵدانی داعش دەرفەتی نوێی بۆ ستراتیژەكەی قاسم سولەیمانی رەخساند، لەبەر ئەوەی لادانی بەشار ئەسەد چیدی وەكو ئەولەوییەتێكی نێودەوڵەتی نەمایەوە، لەلایەكی دیكەشەوە شەڕی دژی ئەو رێكخراوە رێگەی بۆ بە دامەزراوەییكردنی میلیشیا شیعەكان لە هەیكەلی دەوڵەتی عێراقدا خۆشكرد، كە زۆرینەیان پەیوەندییەكی لەمێژینەیان لەگەڵ سوپای پاسداران و شەخسی قاسم سولەیماندا هەیە. رووداوەكانی 2014 سەرەتای دانانی بناغەی قۆناغێكی نوێی درێژكردنەوەی هیلالی شیعی بوون.

 

لە ناوەڕاستی 2015 سولەیمانی كە لە ئێران بە "شەهیدی زیندوو" ناوی دەبەن، هەستی بەوە كردبوو دۆخی سووریا بەپێی پلان ناڕوات، ناكارامەیی سوپای سووریا گوشارێكی دارایی و گیانی زۆری لەسەر میلیشیا شیعەكان دروستكردبوو، بۆیەش دەبووایە زلهێزێكی نێودەوڵەتی بێتە ناو شەڕەكەوە. ئەو كات ئێران و شەش زلهێزی جیهان لە شاری ڤیەننا رێككەوتنە ئەتۆمییەكەیان راگەیاندبوو.

 

لە تەمووزی 2015، سولەیمانی چووە مۆسكۆ و لەوێ لەگەڵ وەزیری بەرگریی رووسیا كۆبووەوە، ئامانجی گەشتەكە ئەوە بوو رووسیا بەشداری راستەوخۆی لە شەڕی نێوخۆی سووریادا بكات.

 

بەگوێرەی راپۆرتەكەی دژەتیرۆری ئەمریكا، چەند هەفتەیەك دواتر سولەیمانی گەڕابووەوە سووریا و ئیدارەی هەڵمەتێكی نوێ لەدژی ئۆپۆزیسیۆن و چەكدارە سوننە جیهادییەكان دەستپێكردبوو.

 

دوو مانگ و نیو دوای گەشتەكەی سولەیمانی بۆ رووسیا، بەشداری راستەوخۆی هێزی ئاسمانی ئەو وڵاتە لە شەڕی نێوخۆی سووریا دەستیپێكرد، هەر ئەمەش باڵانسی هێزی بە قازانجی ئەسەد و میلیشیا شیعەكانی ژێر چاودێری سوپای قودس شكاندەوە.

 

رۆڵی سیاسی و سەربازی سولەیمانی لە عێراق، سووریا، لوبنان و یەمەن بەردەوامە. بەگوێرەی راپۆرتەكەی سۆفان، لە پێش هێرشەكانی 16ی ئۆكتۆبەری 2017 قاسم سولەیمانی سێ جار سەردانی هەرێمی كوردستانی كوردبوو، هەر سێ جارەكەش پشتگیری لە حكومەتەكەی حەیدەر عەبادی، سەرۆكوەزیرانی عێراق، كردبوو، چەند رۆژ دواتریش سوپای عێراق بە پشتیوانی میلیشیاكانی حەشد هێرشیان كردە سەر ناوچە ناكۆكی لەسەرەكان "لەو شەڕەدا سولەیمانی میلیشیاكانی خۆی رەوانەی شەڕەكە كرد بۆ ئەوەی بتوانن كۆنتڕۆڵی ناوچە گرنگەكانی دەوروبەری شارەكە بكەن".

 

دەسەڵاتی حەشد و گروپە شیعەكان لە پەرلەمانی عێراق چانسێكی دیكەی بە سولەیمانی داوە بۆ ئەوەی لە داهاتوودا كاریگەری لەسەر بڕیارە سیاسی، ئابووری و سەربازییەكانی حكومەتی عادل عەبدولمەهدی دابنێ كە بە گوێرەی هەندێك راپۆرت بە رێككەوتنێكی نهێنی نێوان قاسم سولەیمانی و موقتەدا سەدر و دواتر سازش لەگەڵ ئەمریكییەكان ئەو پۆستەی وەرگرتووە.

 

ئەمڕۆ هەینی 03-01-2020 سوپای پاسداران و پێنتاگۆن رایانگەیاند، کە قاسم سولەیمانی، فەرماندەی سوپای قودسی سوپای پاسدارانی ئێران لە هێرشێکی ئەمریکادا کوژراوە. هێرشەکە دوو ئۆتۆمبێلی لە فڕۆکەخانەی نێودەوڵەتیی بەغدا کردووەتە ئامانج. هەروەها حەشدی شەعبی رایگەیاندووە کە هاوکات مەهدی موهەندیس، جێگری سەرۆکی دەستەی حەشدی شەعبییش کوژراوە. ئەمریکا دەڵێت، قاسم سولەیمانی بەرپرسبووە لە هێرشەکەی حەشدی شەعبی بۆ سەر بنکەی سەربازیی کەی وەن لە کەرکووک و خۆپیشاندانەکەی سەر باڵیۆزخانەی ئەمریکا لە بەغدا.

 

 

Qadirzada.com ©2009 - 2020. All rights reserved