ته‌لبه‌ند

ستار ئه‌حمه‌د

په‌نجه‌ره‌ی ئه‌م به‌سته‌ی گریانه‌ درزنابا

 له‌كوێ‌ ده‌توانم ، نیگای تۆ بژمێرم

له‌پشت به‌ربه‌سته‌كانه‌وه‌

له‌گه‌ردی رۆژگارو

شه‌وانی قه‌ترانی ده‌ڕوانی

له‌و دیو لاپه‌ڕه‌ی دڕاوو

وشه‌ی بێ‌ گیان و

خه‌می سركه‌وه‌

تاوتوێی عه‌شق و

یه‌كاڵای ئه‌شكه‌نجه‌ی

برینی گوڵ ده‌كه‌یت

ناتوانی كۆتی خه‌م

له‌ باڵای كۆرپه‌ی حه‌ز داكه‌نی

تاریكی ده‌تباته‌ هه‌ڵدێری نوشستی

لێگه‌ڕێ‌ ده‌روازه‌كان بكرێنه‌وه‌

په‌نجه‌ره‌كان بشكێنه‌

هه‌تاكه‌ی دیواری ترس

سنووری گومان و

په‌نجه‌ی تاریكی

ساته‌كانت داڕووشێنێ‌

روانگه‌كان لێڵبكات

حه‌سره‌ته‌كان له‌خاچ بدات

ویستم ماڵێكبم بۆ گوڵ

دارێك بۆ ته‌نیایی

له‌خۆما نێژرام

به‌دوای سه‌هه‌ندی مه‌رگ وترازانا

چه‌ند مه‌ودای بێشوێنم

له‌خاكی په‌یام و

نه‌شئه‌ی گه‌لادا په‌خشكرد

چڵێك له‌ سێبه‌ری خۆی دوورنه‌كه‌وته‌وه‌

كه‌ناریه‌ك قه‌فه‌سی نه‌شكاند

من له‌ رۆخی په‌ژموورده‌یی و

تۆش له‌پاڵ هه‌وارگه‌ی

خاڵی له‌ عومرو

پڕاوپڕ له‌وه‌رین

تاوێك له‌گه‌ڵ خزانی لوتكه‌و

ساتێك له‌گه‌ڵ سڕینه‌وی رێگاكان وردده‌بینه‌وه‌

نه‌چیا ده‌بێته‌ هه‌نگاوی به‌فرو

نه‌من له‌نیشتمانی ده‌روونتا

خۆزگه‌یه‌ك جوانیم پێده‌به‌خشێ‌

 

Qadirzada.com © 2009-2014. All rights reserved