هه‌ڵڕووشان

دڵۆپ .. دڵۆپ

رۆحم له‌گه‌ڵ

پرشنگی ئه‌ستێره‌و

تیله‌ی تۆدا

ده‌توێته‌وه‌

دڵم شه‌وێكی سامناكه‌

بۆ جیلوه‌ی گیانی شكاوم

گه‌رووی زامی ده‌كرێته‌وه‌

ئێستا ناخم

پڕه‌ له‌خوێنی بێ ورشه‌و

ده‌روونی په‌رش و بڵاوو

عه‌شقێكی هه‌ڵروشاوو

نیگاری درز تێكه‌وتووی

جه‌سته‌ی خه‌ونم

هه‌نسكم قوڵپی گرتووه‌و

چاوه‌كانم كاڵ و كاڵتر ده‌بنه‌وه‌

ده‌بنه‌ گه‌ردێكی شه‌ونم

بای باڵ ده‌ده‌م

به‌رۆچوونی عومری خۆزگه‌و

داڕمانی ئالووده‌بوون و

هه‌لوه‌رینی هه‌ستت ناگه‌م

بوومه‌ته‌ تنۆكێك حه‌سره‌ت

له‌هه‌ناسه‌ی گوڵشه‌نێكا

كه‌ناریه‌ك لێم ناپرسێت

ناشتوانم گه‌ڵای هه‌نارێك

یان تاڵێك په‌رچه‌می ئاڵت

چوون لاسكی گوڵ به‌خۆماده‌م

 

ستار ئه‌حمه‌د

 

Qadirzada.com © 2016. All rights reserved