کۆبانی

‌دڵمان لە ئاستی کۆبانی

‌بەجۆشداوە وەک ئاسنگەر

‌بەڵێن ئەدەین بەیەک هاوار

‌تاکو دەمرین لەناو سەنگەر

‌.....

‌تەمەن فیدای خاک و ئاوت

‌ڕوحمان لە جەستەی تۆدایە

‌ئەگەر ئێمە گشت مناڵ بین

‌هاوار ئەکەین کە تۆی دایە

‌.....

‌بووی بە پێناسەی (بوون) مان

‌ئاوێتە بووی لە گیان و خاک

‌ئەوەی هەستی بۆت نەجوڵێ

‌من پێ ی ئەڵێم کوردی ناپاک

‌.....

سڵاو لەو کوردە نەبەردەی

‌توندو تۆڵە لە سەنگەرا

‌بۆ سەربەستی تێ دەکۆشێ

‌وەک پڵنگی دەشت و دەرە‌

‌.....

لە کوردستانی گەورە دا

‌تۆ بووی بەتارای گوڵی بووک

‌خۆشمان ئەوێ ی وەکو چاومان

‌نووری تۆ وا لە نێو کەرکوک

‌.....

‌بڕۆن بە کۆبانی بڵێن

‌سەنگەر ماڵ و قەبرمانە

‌هەتا ئاسۆی لێ هەڵ نەیەت

‌ئەوێ شوێنی سەبرمانە

‌.....

‌بڕۆن بە کۆبانی بڵێن

‌تۆی هەناسەی گەورە و مناڵ

‌خەبات ئەکەین بۆ ئاڵاکەت

‌بەدرێژایی ڕۆژانی ساڵ

‌.....

فرمێسکەکانی چاوی من

‌لەگەڵ ئاوارەی تۆ ئەتکێ

‌دەست و پەنجەی تفەنگی تۆ

‌بتەکانی دوژمن ئەشکێ

‌.....‌

‌هەر لێرەوە تا کۆبانی

‌پەیام ئەدەین و شوێن بە شوێن

‌سەرمان ، ماڵمان ، خەبات ئەکەین

‌یا ئازادی یا دڵ بەخوێن

‌.....

‌ڕێبوار ئالانی

‌ئەڵمانیا

Qadirzada.com © 2009-2022. All rights reserved