| ||
|
||
پارێزگاری سلێمانی پەیامی ئومێد بڵاودەکاتەوە
دكتۆر هەڤاڵ ئەبوبەكر پارێزگاری سلێمانی پەیامی ئومێدی بۆ رێگری و گرتنە بەرو پابەندبوون بەڕێوشوێنەكان بۆ روبەڕووبونەوەی ڤایرۆسی كۆرۆنا بڵاوكردەوە.
دەقی پەیام:
((پەیامی ئومێد)) بەناوی خودای بەخشندەی میهرەبان هاونیشتمانانی بەڕێز.. گوندنشین و شارنشینانی ئازیز..
ئەم پەتای كۆرۆنایەی سەرزەوی تەنیوە، بووەتە مەترسییەكی گەردونی لەسەر تەواوی مرۆڤایەتیی، تۆی بەهێزو خاوەنئیرادەو دوربین و دنیابین و خاوەنئومێد؛ بەهۆشیاریی خۆت و بەپەیڕەوكردنی ڕێنماییە تەندروستییەكان، دەتوانیت خۆت و خێزان و خزم و خۆشەویستان و خەڵك و تەواوی مرۆڤایەتیی بپارێزیت، ڕێبگریت لە توشبوون و تەشەنەكردن و گواستنەوەو بڵاوبونەوەی.
ئەوەی دەبێتە مایەی خۆپارێزیی و خەڵكپارێزیی و چارەسەرسازیی، خودی خۆتیت كە وەك پزیشكێكی كارامە خۆت لە هۆكارو شوێن و كات و هەڵوسوكەوت و جوڵەكانی توشبوون بپارێزیت و خەڵكانی تریشی لێبەدوربگریت.
ترس و دڵەڕاوكێ و نائومێدیی؛ پشتیوانیی لە تەشەنەسەندن و مانەوەو خێراگواستنەوەی ئەم پەتایە دەكەن، لە ماڵەوە مانەوەو تێكەڵنەبوون و گۆڕین و ڕاگرتنی داب و ڕەفتارە كۆمەڵایەتییە باوەكان و ئۆقرەگرتن و ئارامیی و بەهێمنانە بیركردنەوە؛ هەنگاوی گرنگن بۆ تێپەڕاندنی ئەم دۆخە نائاساییە.
كۆمەڵگای نێودەوڵەتیی، حكومەتی فیدراڵیی، حكومەتی هەرێمی كوردستان، حكومەتی خۆجێیی سلێمانی بەتەواوی دامودەزگاكانییەوە، كەرتی تایبەت و مێدیاكان، ڕێكخراوە نێودەوڵەتیی و مەدەنییەكان و دەستەبژێرو بەهرەمەندو كەسایەتییەكان؛ كاری یاساییانەو كارگێڕییانەو شێلگیرانەو لێبڕاوانەو دڵسۆزانەو زانستییانەو تەندروستییانەیان لەم پێناوەدا كردووە، بەڵام ئەوەی نەخش و بەهاو ئەنجامی باش و سەركەوتوانە بەم پرۆسەیە دەبەخشێت؛ تۆی بەڕێزیت.
ئەم ماوەیە بكەرە ماوەی بەخۆداچونەوەو بەخشش و بەخشین و خۆشەویستیی خۆت و خەڵك و خاك و خۆرو خودا، خۆت لە هەر تێكەڵاوبوون و بۆنەو سروت و كارو چالاكیی و قەرەباڵغییەك بپارێزە، بۆ ئەوەی بتوانیت مرۆڤایەتیی و تەندروستیی گشتیی بپارێزیت. ئومێدو هێماكانی تێپەڕاندنی ئەم دۆخە زۆرن، بەڵام ماوەو خێرایی تێپەڕاندنی ئەم پەتایە؛ وابەستەی هۆشیاریی و خەمخۆریی و گیانی بەرپرسیارانەی تۆیە.
تەندروستیی تۆ یەكسانە بە تەندروستیی گشتیی، ژیان چاوەڕێی هەنگاوەكانی تۆیە بۆ ئەوەی نەمرێت، خۆت بپارێزە بۆ ئەوەی گەردون و ژیان و ژینگەو مرۆڤایەتیی بپارێزیت.
هەموومان؛ چاوەڕوانی هیممەتی مەردانەو هەڵوێستی ژیرانەو هەنگاوی دڵسۆزانەی تۆین. خودای میهرەبان پشتوپەنای هەمووان بێت. سلێمانی و كوردستان و گەردون؛ پارێزراوبێت.
PUKmedia
|
||
Qadirzada.com ©2009 - 2020. All rights reserved
| ||