پارەكە لای كێیە؟ سیاسیەكان، یان سەرمایەدارەكان

فرۆشی نەوتی (6) مانگ كە دەكاتە: (3) ترلیۆن و (432) ملیارد چی بەسەر هات؟

 

نەبەز گۆران

 

ئێستا مۆدێلێك قسەكردن پەیدابووە، ئەم مۆدێلە میدییای كردووەتەوە مینبەرێك بۆ خۆ پاككردنەوە! یان خۆ بە پاڵەوانكردن و گوناهباركردنی ئەوانی تری دەرەوەی خۆی. ئەم مۆدێلە كە میدیا لەگەڵ سیاسییە حیزبییەكان بەرهەم هێنەرین، دونیای دابەشكردووە بەسەر دوو بەشدا. بەشی خۆم پاك و پاڵەوان، ئەوی تر گوناهبار و خراپە. لەكاتێكدا گەر كۆمەڵگە كەمێك هوشیاربێت، هەرگیز ناكەوێتە ژێر كاریگەری ئەم شەپۆلە ناعەقڵانییەوە، چونكە لە كۆتاییدا، ئەوە یاساییە بریاردەدات، كێ‌ پاكە و كێ‌ پاك نیە، نەك خۆ بە پاكزانانی ناو میدیا.

بەهەرحاڵ، لێرەدا دەپرسین: ئەو پارانە لای كێن؟ لای سیاسییە حیزبیەكانن، یان لای سەرماییەدارەكان؟ یان لای ئەو سەرماییەدارانەی سێبەری حیزبن؟

 (خوێنەری بەرێز، وەك خۆت دەزانیت، دوو جۆر سەرماییەدار هەیە. سەرماییەدارێك كە خۆی بكەری بەدەست هێنانی سەرماییە. سەرماییەدارێكیش كە سێبەری حیزبە. هەمیشە ئەوانەی لە میدییاكان خۆیاندەكەنە پاڵەوان و بەپاكزان، تایپی سەرماییەدارە راستەقینەكان نین، سێبەرەكانی حیزبن، سەرماییەداری راستەقینە خۆی پاكە، پێویستی بە میدیا نیە بیكات بە كەرەستەی خۆپاككردنەوەی.)

بۆ روونكردنەوەی پرسیارەكەمان، ئازاری خۆمان نادەین بگەرێینەوە بۆ ساڵانی رابردوو، لێ‌، تەنها ئەم شەش مانگە دەكەینە بنەوانی وەڵامی پرسیارەكەمان. (چونكە، گەر بگەرێینەوە بۆ ساڵانی رابردوو، دەبێت بە زنجیرە كتێب لەسەر داهاتەكان بنووسین، نەك بە وتار.)

لە شەش مانگی رابردوودا وەڵامێكی كورت بەدەست دەهێنیین. بۆنمونە:

 (ئاشتی هەورامی/ وەزیری سامانە سروشتیەكان) لە لێدوانێكدا دەڵێت:

"مانگی (18)ملیۆن بەرمیل نەوت، لە رێگای بۆرییەوە هەناردە دەكەین و دەفرۆشین. (2) ملیۆنیش لە رێگای دیكەوە." واتە (20)ملیۆن بەرمیل نەوت. بۆ هەر بەرمیلێك نەوت (15) دۆلار دادەنێن بۆ كۆمپانیا و باجەكانی ، بە لانی كەم بۆ هەر بەرمیلێك بری (13) دۆلاری پوخت دەهێڵینەوە بۆ حوكومەتی هەرێم، كە ئەمە كەمترینە بۆمان داناوە. بەم نرخە كەمەی دامانناوە بۆ هەموو مانگێك لانیكەم بایی (460)ملیۆن دۆلار پارەی نەوت دێتە سەر بانكی حوكومەتی هەرێم. ئەم (460) ملیۆن دۆلارە بە نرخی ئەمرۆی دۆلار  بكەین بە پارەی عێراقی دەكاتە زیاتر لە (572)ملیارد  دینار.

 

حوكومەتی هەرێمیش دەڵێت:

"مانگانە بری (840)ملیارد دینارم پێویستە بۆ موچە."

كەوایە: (572) كەم (840) دەكاتە (268)ملیارد دینار كەم. ئەم حوكومەتە ئەگەر لە%30 موچەی فەرمانبەریشی كەم بكردایەتەوە، ئەو برە نەوتەی مانگانە دەیفرۆشێت، بەشی موچەی دەكرد بە سەدا سی كەمكردنەوەش. كەچی ئەوە بۆ (6) مانگە، دوو موچەی داوە، موچەی دووهەمیش بەو خشتە نوێیەی ئێستا! بۆچی كەس ناپرسێت فرۆشی نەوتی (6) مانگە كە دەكاتە: (3) ترلیۆن و (432) ملیارد چی بەسەر هات؟ لە كوێیە؟ بۆچی نایدەنە فەرمانبەران؟

یاخود لە تەنیشت ئەمەدا، رۆژانە(800) تەن غاز، لە رێگای داناغازەوە دەفرۆشرێت. بۆ هەر تەنێك كەمترین نرخ دادەنێین، یانی، بۆ هەرتەنێك (400) دۆلار، كە رۆژانە دەكاتە زیاتر لە (320) هەزار دۆلار و مانگانە دەكاتە (9)ملیۆن و زیاتر لە (600) هەزار دۆلار. ئەی ئەمە چی بەسەر دێت؟

 

ئەی داهاتی گومرگەكان؟ داهاتی ناوخۆ... هتد

 

ئەم كەمە ژمارانە دەكەینە بنەوانێك بۆ پرسیارەكەمان، راستی ئەم پارانە لای كێن؟ بێگومان لای سیاسییە حیزبییەكانن. لای ئەو دەستەیەن، بە دیوێكدا كار لەسەر هەست و سۆزی خەڵك دەكەن و سەرقاڵی خۆ پاككردنەوەن، بە دیوێكی دیكەشدا بەناوی جیاجیاوە دەیانەوێت ئەم داهاتانە بخەنە شوێنی تاریكەوە و لەسەر موچەی فەرمانبەر خەریكی پڕكردنەوەی قەیرانەكانن. جیالەمەش، دەیانەوێت فەزاییەك دروست بكەن، لەگەڵ وێنەی خۆیاندا، وێنەی هەموو كەس و، هەموو بازرگانێك و، هەموو هێزێكی دیكە ناشیرین بكەن.

بۆ فریودانیش پرۆژەی چاكسازی دەخرێتە روو! كام چاكسازی؟! ئەم بریاری چاكسازییانە لەم  بەسەر هاتە دەچێت:

 (( برادەرێك پێش ئەم قەیرانە، دەچێت بۆ موچە وەرگرتن.ئەو كارمەندەی موچەكە دەدات، بە برادەرەكە دەڵێت:

جەنابت رائیدیت؟

ئەویش دەڵێت: نەوەڵا قوربان، من قادرم!

كارمەندەكە دەڵێت: ببورە مەبەستم پلەكەتە، پلەكەت بووە بە رائید!

كاك قادریش بە بێدەنگ، موچەی رائیدییەكە وەردەگرێت و دەچێتەوە ماڵ و دەڵێت: عەیبی نیە.

لەم رۆژانە ئەو كاك قادرەی كرابوو بە كاك رائید، لە میدیاكانەوە باسی چاكسازی دەكرد!))

ئەو برادەرەش كە بریاری چاكسازی داوە، بزانین بە پێی بەڵگەكانی بەردەستمان كورە گەورەكەی مانگانە چەندی هەبووە و بریارە چاكسازی لە كێدابكات.

بە پێی بەڵگەكان:

كوڕە گەورەكەی (بارزانی) هەموو مانگێگ تەنها (نەسرییە) واتە بەس (نەسیرییە) هیچی ترنا.  (15) ملیارد دیناری لە ژێر دەستتابووە. لەو (15) ملیارد دینارە، تەنها (3) ملیاردی داوە بە دەزگاكانی ئاسایشی سنووری یەكێتیی نیشتیمانی. دوای برینی بوددجە، نەسرییەكەی كراوە بە(7) ملیارد و(500) ملیۆن بۆ مانگێك. لەو برەپارەیەش تەنها (1) ملیارد و (500) ملیۆنی داوە بە دەزگاكانی ئاسایشی سنووری یەكێتیی. لە ئێستادا ماوەی (3) مانگە، بۆی كەمكراوەتەوە و كراوە بە (5) ملیارد و(500) ملیۆن دینار. بەڵام یەك دینار نادات بە دەزگاكانی ئاسایشی سنووری یەكێتیی!

لەبری ئەمە، كەناڵی ئاسمانی بەم بڕە پارەییە، داناوە!

كاتێك ئەم كۆمیدیایانە دەبینین، ئیدی لە شوێنی خۆمانەوە دەبێت بپرسین:

بەراستی ئەو فەزاییە چیە میدیای كوردیی دروستیكردووە و، خەریكە دارە تەڕە بەردارەكان، لەگەڵ دارە وشكە بێكەڵكەكان بسوتێنێت و، ئەو چاكسازییە چ فریودانێكە لەسەر هەژارەكان بكرێت و بخۆرەكان خۆیانی پێ‌ پاكبكەنەوە؟!

 

 

Qadirzada.com @ 2016. All rights reserved