کەنەکە: دەبێت پشتگیری لە ئیرادەی گەلی باشوری کوردستان بکرێت

 

کۆنگرەی نەتەوەیی کوردستان - کەنەکە، سەبارەت بە دۆخی ئێستای باشوری کوردستان ڕاگەیەندراوێکی بڵاوکردەوە و ڕایگەیاند، دەبێت پشتگیریی ئیرادە گەلی باشوری کوردستان بکرێت.

ئەمڕۆ کەنەکە لەبارەی ڕووداوەکانی ئەم دواییانەی باشوری کوردستان و هێرشەکانی سەری ڕاگەیەندراوێکی بڵاوکردەوە،

 

کەنەکە ڕایگەیاند:

سەرەڕای ڕێنمایی و تکای کوردستانیان و دۆستانی کورد کە ڕیفراندۆم لانی کەم بە مەبەستی خۆئامادەکردن دوابخرێت، بە داخەوە دەسەڵاتی باشوور هەر لە سەر بەئەنجامگەیاندنی ڕیفراندۆم سوور بوو، لە ئاکامدا لەگەڵ هەموو ناکۆکییەکانیشدا نزیکەی ٩٣ ٪ لە خەڵکی باشوور دەنگی بەڵێیان دا، بەڵام پاش هەڕەشە و هێرشەکانی دەوڵەتی عێراق، بە داخەوە دەسەڵاتی باشوور بێدەنگ و بێ کردەوە و بێ پلان ماوەتەوە، قسەیەک لە سەر ئەوەی چی بکرێت و چۆن بکرێت نابیسترێت و خۆ بەیان کردنێکی نیشتیمانیانە و بەرپرسیارانە نابینرێت.

 هاوکات دەوڵەتی عێراق بە پشتگیریی سەربازیی و زانیاریی و پروپاگەندەیی ئێران و تورکیا،  پێی ناوەتە نێو شەڕێکی سەربازیی و دەستتێوەردان لە باشوور و ترساندنی خەڵک، بەتایبەتیی سیاسەتی دوژمناکارانە بە هەوڵدان بۆ لێکترازاندن و دوورخستنەوەی کوردان لە یەکتر و بەگژیەکدا کردنی کورد، رەفتاری شەڕخوازانەی ئێران و تورکیا و عێراق لە سەر باشوور تا دێت زیاتر دەبێت، ئێمە لە کۆنگرەی نەتەوەیی کوردستان بەهیچ شێوەیەک هەڵوێستی دوژمنکارانەی ئەو دەوڵەتانە و بێڕێزیکردن بە گەلی باشووری کوردستان قبوڵ ناکەین، دەبێ تورکیا و ئێران و عێراق ئەو ڕاستییە بزانن کە گەلی کوردستان لەژێر هیچ گوشار و هێرشێکدا دەستبەرداری مافی ڕەوای خۆیان نابن.

کۆنگرەی نەتەوەیی کوردستان هەروەها بەبیر هەمووانی دەهێنێتەوە کە عێراق دەوڵەتێکی فیدراڵییە و بەپێی دەستووری عێراقیش هەرێمی کوردستان قەوارەیەکە لەو فیدراڵیەدا، بۆیە پێویستە بەپێی دەستوور مامەڵە لەگەڵ پرسی هەرێمی کوردستان بکرێت، ڕێز لە ئیرادە و خواست و مافی گەلی باشوور بگیرێت، هەروەها دەسەڵاتی هەرێمی کوردستانیش لە پەیوەندیدا لەگەڵ حکومەتی عێراق شکۆ و ڕێزی گەلی باشوور بپارێزێت و بە جەسووریی و جددییەتەوە وەڵامی دەستتێخستن و پیلانەکانی تورکیا و ئێران بداتەوە.

 کۆنگرەی نەتەوەیی کوردستان- کەنەکە داوا لە دەسەڵاتدارانی باشوور دەکات کە لە سەر ئاستی بەرپرسیارێتیان رەفتار بکەن، پشتیوانی ئیرادەی گەلی باشوور و کوردستان بکەن،  پێویستە ئیدی ئەڵتەرناتیڤ بۆ دۆخی قەیراناوی و شکستخواردوو  هەبێت، پێوستە حکومەتێکی جەسوور و پەرلەمانێکی بە ئیرادە و پڕ لە وزە و  بکەوێتە کار، گەلی باشوور هەرگیز شایانی ئەوە نین شکۆ و شانازیی نەتەوەییان بشکێندرێت، ژنان و پیاوانی باشوور توانای ئەوەیان هەیە بەسەرکەوتووی خۆیان بەڕێوە ببەن و سەربەرزیی و شکۆی گەلەکەشیان بپارێزن.

 کە لەبەر هۆکاری سیاسیی ڕوون و ئاشکرا لەگەڵ دەسەڵاتی حکومەتی هەرێمدا، گشتگیرانە سزای خەڵکی باشوور نەدەن و پشت لە خەڵکی کوردستان نەکەن، دەبێت ڕێز لە دەنگدانی خەڵکی باشوور بۆ بڕیاردان لە سەر هەبوونی ماف بۆ دیاریکردنی چارەنووسی خۆیان بگیرێت.

لەو بارەوە کۆنگرەی نەتەوەیی کوردستان داوا لە هەموو کوردستانییەکی دڵسۆز دەکات هەر جۆرە لایەنێک کە دەستدرێژیی دەکاتە سەر خەڵک و خاکی کوردستان، جا لە ژێر هەر ناوێکدا بێت بە داگیرکەریان بزانن و بەو شێوەیە مامەڵەیان لەگەڵدا بکەن و بەرپەرچیان بدەنەوە، کۆنگرەی نەتەوەیی کوردستان، بێگومان لەگەڵ چارەسەری ئاشتیی و دیالۆگی دیموکراتی و درەوسێیانەدایە، بەڵام بەکارهێنانی مافی خۆپاراستنی ڕەوا لەپێناو پاراستنی شانازی و سەربەرزیی و بەها مرۆڤایەتییەکانی خەڵکی کوردستان، ئەرکی سەرشانی هەموومانە.

کوردستانیانی دڵسۆز دەبێت لە سەر خەباتی خۆیان بۆ برایەتیی گەلان، بۆ ڕێزگرتن لە مافی دیموکراسیی و مرۆڤایەتیی خەڵک، بۆ سیستەمێکی دیموکراسیی بەردەوام بن.

 

 

Qadirzada.com © 2017. All rights reserved